Qırımnıñ sabıq prezidenti Yuriy Meşkov Ukraina prezidenti Volodımır Zelenskıyge muracaat etip, yarımadağa esas Ukrainadan suv berilmesini ve trenlerniñ qatnamasını yañıdan başlatmağa rica ete. Bu aqta Qırım.Aqiqat muarririyeti elde etken Meşkovnıñ muracaatında aytıla.
«Şimaliy-Qırım kanalı üzerinden suv berilüvi ve Qırım ve Ukraina arasında demiryol alâqalarını yañıdan başlatuv meselelerini baqmağa rica etem», – dep yazdım Meşkov.
Meşkov öz mektübinde Şimaliy-Qırım kanalında suv qapatılması insanlarnıñ yaşayışını fenalaştırdı ve Ermeni Bazardaki «Krımskiy titan» zavodında himiyeviy taşlantılarnıñ avağa atılmasına sebep oldı, dep qayd ete. Demiryol alâqalarınıñ toqtatılması sebebinden ise «Ukrainada tuvğanları yaşağan bir çoq qırımlı qoranta bugün bölüngen qala», dep qoştı Meşkov.
Volodımır Zelenskıy ya da taqımınıñ vekilleri buña daa cevap bermedi.
1990-ıncı yıllarnıñ başında Yuriy Meşkov Qırımnıñ Cumhuriyet areketi ve «Rusiye» Blokunıñ yolbaşçısı edi, olar yarımadanıñ Ukrainadan mustaqil olmasına ve daa soñra Rusiye Federatsiyasına qoşulmasına qoltutqan ediler.
1994 senesi Qırımnıñ ilk ve soñki prezidenti olaraq saylanğan edi.
«Rusiye» blokundaki bölünüv ve Ukraina akimiyetiniñ areketleri neticesinde Rusiyege ketmege mecbur edi. Yarımada işğaline qadar anda yaşağan edi. Şimdi Kreml kontrolindeki Qırım akimiyetine muhalif ola.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımnıñ Rusiye tarafından ilhaqı munasebeti ile 2014 senesi dekabrniñ 27-sinden başlap «Ukrzaliznıtsâ», telükesizlikni temin etmek maqsadınen Qırım ile demiryol alâqasını kestirdi ve yarımadağ qatnağan halqara trenlerini lâğu etti. Qırım doğrultısında qatnağan trenler yalıñız Novoalekseevka ve Hersonğa qadar bara ediler.
