Sentâbrniñ 1-nde Türkiyede insult olğan Qırımnıñ sabıq prezidenti Yuriy Meşkov paraliç oldı ve körlaştı. Bu aqta sentâbrniñ 5-nde Qırımdaki Rusiye tarafdarı cemaat faali Sergey Akimov Qırım.Aqiqatqa bildirdi.
«Soñki malümatqa köre, damna urdı. Ayaqları, qolları çalışmay. Şimdi soqurlaşqanı da belli oldı. Eşite, «ebet», «yoq» dep cevap bermek içün közlerini umıp aça. Bugünki künde alı ağır», – dedi Akimov.
Onıñ aytqanına köre, sentâbrniñ 11-nde Yuriy Meşkovnı Rusiye Fevqulâde vaziyetler nazirliginiñ uçağınen Moskvağa yollamağa planlaştırıla.
Al-azırda Türkiye, Rusiye ve işğal etilgen Qırım müessiseleri bu malümatnı tasdıqlamay.
Sentâbrniñ 1-nde Yuriy Meşkovnıñ qızı Marianna babası insultqa oğrağanını Facebook saifesinde yazğan edi. Onı suniy komağa kirsetken ediler. Uyatqanda ise o, «laf etmey ve qıbırdamay edi».
1990-ıncı yıllarnıñ başında Yuriy Meşkov Qırımnıñ Cumhuriyet areketi ve «Rusiye» Blokunıñ yolbaşçısı edi, olar yarımadanıñ Ukrainadan mustaqil olmasına ve daa soñra Rusiye Federatsiyasına qoşulmasına qoltutqan ediler.
1994 senesi Qırımnıñ ilk ve soñki prezidenti olaraq saylanğan edi.
«Rusiye» blokundaki bölünüv ve Ukraina akimiyetiniñ areketleri neticesinde Rusiyege ketmege mecbur edi. Yarımada işğaline qadar anda yaşağan edi. Şimdi Kreml kontrolindeki Qırım akimiyetine muhalif ola.
