Rusiye kontrolindeki Qırım tasil, ilim ve gençlik nazirligi netice kollegiyasınıñ iştirakçileri Qırım müendislik ve pedagogika universitetine temelcisi, Ukraina Qaramanı Fevzi Yakubovnıñ adını berüv teşebbüsine qoltuttı. Bu aqta «Krımskaya pravda» yerli neşiri yaza.
«Bunı eñ qısqa müddet içinde yapmaq içün qarar bugün tizilecek», – dedi kollegiya toplaşuvında Rusiye naziri Natalya Gonçarova.
Kreml kontrolindeki Qırım yolbaşçısı Sergey Aksenov bu qararnı «adaletli» dep adlandırdı.
Aliy oquv yurtuna Fevzi Yakubovnıñ adını bermek teklifi Rusiye tarafdarı olğan «Qırım» cemaat areketiniñ prezidium azalarından keldi.
Fevzi Yakubov cuma künü, avgustnıñ 23-nde, 82 yaşında devamlı hastalıqtan soñ vefat etti. Bazar künü, avgustnıñ 25-nde, Qırım müendislik ve pedagogika universitetiniñ hollında vedalaşuv merasimi olıp keçti.
Yakubov – tehnik ilimleri doktorı, professor, Özbekistanda nam qazanğan ilim erbabı, Ukrainada nam qazanğan tasil hadimi, Qırımnıñ nam qazanğan vatandaşı, Ukraina Qaramanıdır.
Rusiyeniñ Qırım işğalinden soñ Yakubov Rusiye prezidenti Vladimir Putinniñ işançlı şahsı oldı.
