Kreml tayin etken Qırım yolbaşçısı Sergey Aksenov yarımadada ealini cedvelge almaq içün azırlıq aqqında buyruqnı imzaladı.
Qırımnıñ Rusiye ükümetiniñ resmiy saytında derc etilgen vesiqada 2020 senesi yarımadada ealini cedvelge almaq içün azırlıq yapacaq komissiyanıñ qurulması aqqında aytıla.
Ealini cedvelge aluv boyunca komissiya erkânına Kreml kontrolindeki Qırım nazirleri, şeer ve rayonlarnıñ memuriyet yolbaşçıları, diger küç hızmetleriniñ vekilleri kirdi.
Bundan evel Qırımnıñ Rusiye akimiyeti 2014 senesi oktâbr ayında ealini cedvelge alğan edi. Şu sebepten Ukraina Rusiyege narazılıq bildirgen edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
