Kreml kontrolindeki Qırım akimiyeti dünyada tarqalğan koronavirus telükesi sebebinden Herson vilâyetiniñ memuriy sıñırındaki keçiş noqtasını qapatmağa teklif ete.
Bu aqta martnıñ 16-nda jurnalistlerge Qırımnıñ Rusiye yolbaşçısı Sergey Aksenov ayttı.
«Sıñırda bütün tenbileyici tedbirler alına, şimdi Vladimir Andreyeviç (Konstantinov, Qırım parlamentiniñ spikeri – QA) ve Qırımdaki FSB idaresiniñ yolbaşçısınen (Leonid Mihaylüknen – QA) laf ettik. Federal akimiyeti Qırımnıñ Ukraina ile sıñırını qapatsın dep, bugün paytahtqa teşebbüsimizni bildiremiz», – dep bildire Aksenovnıñ aytqanlarını «Krıminform» saytı.
Onıñ bildirgenine köre, Qırımnıñ Rusiye sağlıq nazirligi bütün sıñır noqtalarını ziyaret etti ve anda qoşma tibbiy hadimlerni yolladı.
Ukraina Devlet sıñır hızmetiniñ Qırım.Aqiqatqa bildirgenine köre, Qırım ve Herson vilâyetiniñ memuriy sıñırındaki vaqtınca olğan keçiş noqtaları çalışa, çoq insan yoq.
Herson sıñırcılarınıñ Qırım.Aqiqatqa bildirgenine köre, memuriy sıñırdaki sıñırlavlarnen bağlı resmiy bir emir daa yoq.
Ukraina İç işler naziri Arsen Avakov, işğal etilmegen esas Ukrainada qayd olmağan ukrainalılarnı Donbastaki kontrol keçiş noqtalarından ve işğal etilgen Qırımnıñ memuriy sıñırından keçirmemege teklif ete.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
