Qırımtatar Milliy Meclisiniñ reisi Refat Çubarov Ukraina Anayasa Künü hayırlavında memleketniñ topraq bütünligini ğayrıdan tiklev müim ola, dep bildirdi.
«Altı yıldan berli devam etken Rusiyeniñ Ukrainağa qarşı arbiy istilâsı neticesinde devletimizniñ topraq bütünligi bozuldı – Qırım işğal altında ve Lugansk ve Donetsk vilâyetleriniñ ayrı rayonlarında kontrol coyuldı. Kimsege – ne tış duşmanğa, ne iç işbirlikçilerge, ne de ayrı devletlerge – Ukrainanıñ topraq bütünligini şübhege oğratmağa ve Ukrainanıñ bir qısmını işğal etken Rusiye ile añlaşmağa bermeycekmiz», – dep qayd etti Çubarov.
Onıñ aytqanına köre, Ukraina topraq bütünliginiñ halqara seviyede tanılğan sıñırlarda, Qırım Muhtar Cumhuriyeti ve Aqyarnen beraber, ğayrıdan tiklenmesi Ukrainanıñ saqlap qaluv ve kelecek meselesidir.
«Ukraina devletiniñ kelecegi içün Qırım statusınıñ Ukraina terkibindeki qırımtatar milliy-territorial muhtariyet olaraq belgilenmesi pek müim ve belgileyci ola. Memleketimizniñ müim bayramlarından biri – Ukraina Anayasa Künü – munasebetinen samimiy tileklerimizni bildiremiz», – dep bildirdi siyasetçi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
