Ukraina Devlet Sıñır Hızmeti, “Qırımnıñ qanunsız ziyaretinden sebep” eki Rusiye aktörına Ukrainağa 3 yıl devamında kirişni yasaqladı. Bu hususta müessise beyanatında bildirile. Amma aktörlarnıñ adları belgilenmey.
Ukrain sıñırcılarnıñ malümatına köre, aktörlarnıñ birisini “Borispil” ava limanında toqtattılar, o Minsk uçağınen kelgen.
“Ukraina qanunlarına qarşı Qırımğa barğan, o bir Rusiye aktörı ise, Ukrainağa Odessa ava limanından kelgen.O serial çeküvlerinde iştirak etecek edi”, - haber etile beyanatta.
Müessise bildirgeni kibi, yılnıñ başından “Qırımnı qanunsız ziyaret etken” 35 ecnebiyge Ukrainağa kiris yasaq etildi.
Daa evel, Ukraina İİN, başqa memleket vatandaşlarına ve vatandaşlıqsız adamlarğa ilhaq etilgen Qırımğa ziyeretlerden vazgeçmege muracaat etti,
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
