Rusiye kontrolindeki Qırım yolbaşçısı Sergey Aksenovnıñ bildirgenine köre, çarşenbe künü, aprelniñ 29-nda, yarımadanıñ koronavirus ile küreş şaraitlerinde angi cedvelge köre yaşaycağı belli olacaq.
Bu aqta o, aprelniñ 27-nde COVID-19 ile küreş operativ ştabınıñ toplaşuvında ayttı.
«Memleketniñ prezidenti (Rusiye prezidenti Vladimir Putinniñ – QA) ve memleketniñ operativ ştabı alğan qararlarına esaslanıp, mayısnıñ 1-nden olacaq nizamnı aprelniñ 29-nda ştab toplaşuvında ilân etecekmiz. Mayısnıñ 1-nden başlap belli saalarğa çalışmağa izin berecek olsaq, aprelniñ 29-na qadar er kesniñ azırlanmaq içün vaqtı bar. Mayısnıñ 11-ne qadar tatil ilân etilecektir», – dedi Aksenov.
Keçken aftanıñ soñunda Aksenov Qırımda koronavirus sebebinden sıñırlav tedbirleriniñ uzatıluvınen bağlı qarar kelecek afta ilân etilecek, dep bildirdi.
Aprelniñ 22-nde Aksenovnıñ aytqanına köre, işğal etilgen yarımadada koronavirusnen bağlı sıñırlavlar sebebinden qapatılğan obyektlerniñ hızmet saası işini yañıdan başlatmağa planlaştırıla.
Qırımda ve Aqyarda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi aprelniñ 30-na qadar devam ete.
Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. 20-si çetelden keldi, 10-u Rusiyeden, 40-ı yerli ola. Aqyarda, soñki malümatqa köre, 31 COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
