İşğal etilgen Qırım ve Herson vilâyetiniñ memuriy sıñırında yañı kontrol keçiş noqtalarını qurulmağa başladılar, dep bildire Herson vilâyetiniñ yolbaşçısı Yuriy Gusev.
Bu malümat Herson vilâyetiniñ devlet memuriyeti saytında derc etildi.
Gusevniñ aytqanına köre, yañı «Çonğar» ve «Kalançak» keçiş noqtalarınıñ qurucılığı sentâbrniñ 20-nde başlandı. İşler noyabrniñ soñuna qadar devam etecek.
«Çonğar» ve «Kalançak» keçiş noqtalarınıñ rejim alanlarınıñ qurucılığını noyabrniñ 15-ne qadar bitirmege avale etken prezident Volodımır Zelenskıynıñ vazifelerini vaqtında ve keyfiyetli şekilde yerine ketirmek içün obyektlerde bugün endi iş başlandı», – dep qayd etti Gusev.
Daa evel haber etilgeni kibi, işğal etilgen Qırımda yarımadanıñ Herson vilâyeti ile memuriy sıñırındaki «Armânsk» Rusiye keçiş noqtasınıñ kirişinde kontrol-keçiş noqtası ve şlagbaum qoyuldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
