Ukraina infrastruktura naziri Vladislav Krikliy Qırımnıñ memuriy sıñırında resmiy yolcu taşımasını teşkil etmege planlaştıralar, dep bildirdi. Bunı Herson vilâyetiniñ akimiyeti keçiş noqtaları donatılğan soñ yapacaq. Bu aqta Ukraina naziri Azatlıq Radiosına tarif etti.
«Keçiş noqtalarını quramız… «Ukrzaliznıtsâ» bu leyhanı qura. Prezident vazife bergeni kibi, vaqtında qurarlar, dep tüşünem. Servis qısmı da anda qurulacaq ve avtostantsiyalar. Taşıycılar yarışını ise yerli akimiyet bizim iştirakimiznen keçirecek», – dedi Krikliy.
Memuriy sıñırdan resmiy taşıma olacaqmı sualine nazir böyle cevap berdi: «Mıtlaq».
Bu sene iyül ayında Ukrainanıñ vaqtınca işğal etilgen topraqları ve memleket içinde köçip kelgenler meseleleri nazirligi qanunsız yolcu taşımalarınıñ kârı onlarnen biñ dollar teşkil etmekte, dep bildirgen edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
