Herson vilâyetinde Qırım ve esas Ukrainanıñ memuriy sıñırındaki «Çonğar» ve «Kalançak» kontrol keçiş noqtaları yanında McDonald’s restoranları açıla bile.
Ukraina infrastruktura naziriniñ muavini Yuriy Lavrenükniñ Tsentr jurnalistskih rassledovaniy neşirine aytqanına köre, keçiş noqtasında qurucılıq işlerini eda etecek müessise olaraq belgilengen «Ukrinteravtoservis» reberligi McDonald’s şirketi ile muzakereler keçire.
«Ukrinteravtoservis» devlet müessisesiniñ reberligi McDonald’s şirketi ile keçiş noqtalarımıznıñ hızmet alanlarında McDonald’s küçük restoranlarını açmaq içün muzakereler keçire. McDonald’s öz şartlarını qoya, devlet müessisesi olarnı yerine ketirip olurmı-yoqmı dep tüşüne», – dedi Yuriy Lavrenük.
Onıñ aytqanına köre, memuriy sıñırdan keçecek vatandaşlarğa avropalı hızmet, hususan aşta kösterilecek.
Qırım.Aqiqat infrastruktura naziriniñ muavini bergen malümatnen bağlı izaat almaq içün McDonald’s ukrain temsilciligine muracaat etecek ola.
2018 senesi iyülniñ 4-nde Ukraina ükümeti №584 qararnı qabul etti. Oña binaen, devlet bücetiniñ yedek fondundan Qırımnıñ memuriy sıñırındaki «Kalançak» ve «Çonğar» keçiş noqtalarınıñ donatılmasına 105 mln 983 biñ 571 ğrıvnâ ayırıldı.
McDonald’s Qırım restoranları 2014 senesi aprelniñ 3-nde «istisal sebeplerden» qapatıldı.
Hadimlerine Ukrainanıñ diger şeerlerine işke keçmege teklif etildi.
2017 senesi aprel ayında McDonald’s ukrain temsilciliginiñ matbuat hızmeti Rusiyeniñ yarımada işğalinden evel şirketke ait Qırım binalarını satqanını tasdıqladı.
