Qırımnıñ memuriy sıñırı yaqınındaki Herson vilâyetiniñ Novooleksiyıvka qasabasında yanvarniñ 4-nde Qırımda Rusiye uquq qoruyıcıları tarafından tutulğan qırımtatar faali Edem Bekirovğa qoltutuv aktsiyası olıp keçti.
Qırım.Aqiqat mühbiriniñ bildirgenine köre, aktsiya yerli cami yanında keçirildi, iştirakçileri yazuvlı şiarlarnen keldi: «Geniçesk rayonınıñ cemaatı – Edem Bekirovğa azatlıq», «Ayatını qurtarmağa yardım etiñiz», «Ukrainalı siyasiy mabüslerge azatlıq».
«Birisiniñ acısına lâqayt qalmağa olmay. Edem ağa saqat olsa da, cami qurucılığına issesini qoşqan edi. Dua etemiz ki, Allah oña yardım etsin, oña küç-quvet bersin, eñ yaqın vaqıtta onı azat ettirsin», – dep ayttı Novooleksiyıvka qasabasındaki cami imamı Üsein Tohlu.
Mabüs Edem Bekirovnıñ ömür arqadaşı, Geniçesk rayon devlet memuriyeti yolbaşçısınıñ muavini Gülnara Bekirova toplaşqanlar ögünde çıqışta bulunıp, aktsiya iştirakçileri tek onıñ aqayını degil, Rusiye ve işğal etilgen Qırımda tutulğan diger siyasiy reinelerni de azat etmege talap ete, dep qayd etti.
«Lâqaytlıqtan zarar köremiz. Bu vaziyette insanlarnıñ lâqayt olmağanını köremiz, insanlar bir belâ etrafında birleşe, çünki bu belâ Qırımğa barğan er bir Ukraina vatandaşınıñ başına kele bile, onı da aynı şekilde sahte qabaatlay bileler. Anda Stalin repressiv sistemasınıñ izdeşleri çalışa», – dep qayd etti Herson vilâyetindeki regional Meclisniñ reisi Lenur Lümanov.
Qırım.Aqiqat mühbiriniñ bildirgenine köre, aktsiyada cemaat teşkilâtları, yerli meclis ve Geniçesk rayon devlet memuriyetiniñ vekilleri iştirak etti.
Daa evel belli oldı ki, Ukraina Yuqarı Radasınıñ insan aqları vekâletlisi Lüdmila Denisovanıñ ofisi Rusiye ombudsmeni Tatyana Moskalkova ve Rusiye prezidenti yanındaki insan aqları şurasınıñ reisi Mihail Fedotovğa muracaat etip, Qırımda apiske alınğan qırımtatar faali Edem Bekirovğa yardım kösterilmesinde iştirak etmege rica etti.
Rusiye kontrolindeki Qırım Yuqarı mahkemesi Aqmescitniñ Kiyev rayon mahkemesiniñ qırımtatar faali Edem Bekirovnı apiske almaq qararına qarşı itiraz arizasını fevralniñ 10-nda baqmağa planlaştıra.
Bekirovnıñ tuvğanları ayatı telükede olğanını bildirgen edi. Malüm ki, mabüs şeker hastası ola. Onıñ ayağı kesilgen edi, er vaqıt sarğılavlar yapılmaq kerek.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
