Tünevin Qırımda bir koronavirus adisesi bar edi, bu - İslâm Terek rayonındaki tibbiy müessisesiniñ işçisi.
Bunı aprelniñ 27-sinde Qırımnıñ rusiyeli başı Sergey Aksönov bildirdi.
"Hasta tibbiy yardımnı istep muracaat etkende belgilendi, oña "hastahaneden tış pnevmoniya" diagnozını qoydılar. Epidemiologiya tahqiqatınıñ neticelerine köre onıñ alâqa dairesi beldilendi, olarğa qarşı profilaktika tedbirler ve laboratoriya teskerüvleri yapıldı", - dedi o.
Böylece, şimdilik Qırımda 70 koronavirus hastası qayd etildi. Olardan 20-si çetelden, 10-u - Rusiyeden ketirildi, daa 40 adise - yerlidir.
Soñki malümatqa köre, Aqyarda 31 COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
