Ukraina TİN sabıq başı Pavlo Klimkin, Qırımnıñ işğalden azat etüv ve reintegratsiya Strategiyasını Nazirler kabineti degil, Ukraina Milliy telükesizlik ve mudafaa şurası koordinatsiya etmek kerek, dep saya.
«Tünevin yayınlanğan Qırım ile bağlı strategiyanı oqudım. Gizli qısmı olmadan onı talil etmek manası yoq, pek çoq doğru beyannameler bar, amma Rusiye Qırımnı boşatması içün oña qarşı tazyıqnı quvetleştirecek ve Qırım aqqında qonuştıracaq makheme davalarından ğayrı bir şey yoq. Belki de, gizli qısmı meraqlıca. Amma büyük bir hata bar. Strategiyanı, Donbasnen olğanı kibi Nazirler kabineti degil, Ukraina Milliy telükesizlik ve mudafaa şurası koordinatsiya etmek kerek», – dep yazdı Klimkin Facebookta.
Ukraina prezidenti Volodımır Zelenskıy Qırımnı işğalden qurtaruv ve reintegratsiya strategiyasını işke tüşürdi.
Berilgen malümatqa köre, Ukraina Nazirler şurası vaqtınca işğal altındaki Qırımnı işğalden qurtaruv ve reintegratsiya strategiyasını kerçekleştirüv planını azırlamalı. Onıñ esasında devlet organları yarımadanıñ işğalini bitirüv ve reintegratsiya teminlevi tedbirlerini azırlap yerine ketirecektir.
Ukraina milliy telükesizlik ve mudafaa şurasınıñ kâtibi Oleksiy Danilov martnıñ 11-nde «Qırımnı işğalden qurtaruv meselesinde nasıl areket etecegini tam belgilegen Rusiyeniñ Qırım işğali başlağanından berli ilk temel vesiqası» azırlanıla, dep ilân etti. Prezident Zelenskıy, «işğal şaraitlerini kim ve nasıl yaratqanını» bilmek de müim ola, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
