Rusiye kontrolindeki Qırım Fevqulâde vaziyetler nazirliginiñ yolbaşçısı 65 yaşında Sergey Şahov koronavirus hastalığı neticesinde vefat etti.
Bu aqta yanvarniñ 4-nde Rusiye ve Qırım kütleviy haber vastaları Rusiye Fevqulâde vaziyetler nazirliginiñ matbuat hızmetiniñ malümatına esaslanıp bildire.
İnterfaks ve TASS malümatına köre, Şahov bazarertesi künü, yanvarniñ 4-nde, kövid hastahanesinde can berdi.
Qırımnıñ Rusiye akimiyeti nazirniñ vefatı aqqında resmiy şekilde daa bildirmedi.
Şahov 1955 senesi iyünniñ 20-nde Donetsk vilâyetiniñ Nova Ğorlivka şeerinde dünyağa keldi. 2011 senesinden 2013 senesine qadar – Qırım Muhtar Cumhuriyetindeki Ukraina Fevqulâde vaziyetler nazirligi baş idaresiniñ yolbaşçısı; 2013 senesinden 2014 senesine qadar – Qırım Muhtar Cumhuriyetindeki Ukraina Fevqulâde vaziyetler devlet hızmeti baş idaresiniñ yolbaşçısı.
Qırımnıñ Rusiye işğalinden soñ, 2014 senesi mart ayından 2018 senesi iyünniñ 4-ne qadar, Qırımdaki Rusiye Fevqulâde vaziyetler nazirligi Baş idaresiniñ yolbaşçısı, 2014 senesi iyülniñ 1-nden berli – Qırımnıñ Rusiye fevqulâde vaziyetler naziri.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
