Ukraina Tış işler naziriniñ birinci muavini Emine Ceppar, Rusiye tarafından Qırımnı arbiyleştirüv ve yarımadağa ealisini avuştıruv suv ve tabiat resurslarınıñ yoq etilüvine keteri, dep saya.
«Rusiye tarafından ukrain yarımadasını faal arbiyleştirüv, işğal etilgen Qırımğa Rusiye vatandaşlarını avuştıruv suv ve diger tabiat resurslarını yoq ete d ve ekologik felâket içün telüke yarata. Yerastı suvlarnıñ qullanılması içün quyularnıñ faal qazuluvı topraqnıñ tuzlaşuvına sebep ola. Ve bu buzdağınıñ daa tek töpesi», – dep yazdı Ceppar.
Ukraina TİN «halqara uquqqa ve konkret faktlarğa esaslanıp bütün vaqıt bu mevamnı dünyağa añlatmağa tırışa».
Aynı zamanda, Ceppar, Rusiyeniñ Qırım ealisini suv ile temin etmek mesülietinden qamağı tırışqanına emindir.
Rusiye kontrolindeki Qırım ükümetiniñ Mesken-kommunal hocalığı nazirligi yarımadanıñ esas suv anbarlarınıñ tolmasına dair malümatnı yañarttı.
Keçken afta qırımlı iş adamı, «Skazka» ayvanat bağçası ve «Taygan» arslanlar parkınıñ saibi Oleg Zubkovnıñ Qırım.Aqiqatqa bildirgenine köre, Qarasuvbazar ve Taygan suv anbarlarında pek az suv qaldı. Qırım akimiyetiniñ malümatına köre, Aqmescit suv anbarlarınıñ yedekleri pek artmay.
Rusiye kontrolindeki Qırım akimiyeti keçken afta yerli telekanalnıñ yayınında Beşterek-Zuyadan Aqmescitke suv berilip başladı, dep bildirdi.
Rusiye ükümetiniñ matbuat hızmeti bildirgenine köre, Qırım ve Aqyarnıñ suv teminlevini eyiliştirmek içün Rusiye bücetinden 3,2 mlrd ruble berilecektir.
Suv qıtlığı sebebinden keçken seneden berli Aqmescitte ve diger regionlarda suv berüv cedvelleri kirsetildi. Bunıñnen beraber Aqmescitte suv teminlevi hatlarında qazalar ola, bu da suv kesilüviniñ sebebi ola.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
