Cumaaqşamı künü, iyülniñ 30-nda, işğal etilgen yarımadanıñ Rusiye kontrolindeki eki farqlı mahkemede qırımtatarlarnıñ milliy lideri Mustafa Cemilevge qarşı birden eki oturışuv olacaq – Ermeni Bazar şeer mahkemesinde (10:00) ve Qırımnıñ Yuqarı mahkemesinde (14:00). Bu aqta advokat Nikolay Polozov Facebook saifesinde bildirdi.
Advokatnıñ qayd etkenine köre, Ermeni Bazarda qabaatlav tarafı delillerni kösterip başlaycaq ve qabaatlav tarafınıñ bir qaç şaatı sorğuğa çekilecek, dep beklenile.
Aynı vaqıtta Qırımnıñ Yuqarı mahkemesi Mustafa Cemilevniñ apiske alınmasından başlap 2 ay apiste tutuv olaraq belgilengen sıñırlav tedbirini deñiştirmemek qararına qarşı berilgen istinaf şikâyetini baqmalı.
«Ermeni Bazar ve Aqmescit arasında bayağı yol bar. Bir problem çıqmaz, dep ümüt etem», – dep qayd etti Polozov.
Daa evel Polozov Ermeni Bazar Rusiye mahkemesiniñ müvekkiline bergen sıñırlav tedbirine qarşı şikâyet arizasını berdi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
