Qırım müendislik pedagogika universiteti (QMPU) vaqtınca uzaqtan tasil berecek, dep bildirdi aliy oquv yurtunıñ rektorı Çingiz Yakubov «Krım 24» telekanalına.
«Profilaktika tedbirleri çerçivesinde vaqtınca uzaqtan tasil bermege qarar alındı. Bu qarar universitet memuriyeti tarafından qabul etildi», – dedi o.
Daa evel berilgen malümatqa köre, martnıñ 16-ndan başlap Aqmescitteki Vernadskiy Qırım federal universitetinde (işğalden evel Vernadskiy Tavriya Milliy universiteti – QA) COVID-19 koronavirusı tarqalğanı sebebinden uzaqtan tasil berilecek.
Aqmescitte koronavirus telükesi sebebinden Tezikov tsirki qapatılğanı aqqında haber etildi.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti.
Qırımda koronavirus qayd etilgen memleketlerden kelgenler içün tevsiyeler çıqarıldı.
