Qırımnıñ birinci prezidenti Yuriy Meşkov 74 yaşında bu bazar künü, sentâbr 29-ında kündüz vefat etti. Bunı onıñ qızı Marianna Meşkova Facebookta haber etti.
Bundan ğayrı, Marianna Meşkova bu malümatnı İnterfaks rusiye haber egentligine tasdıqladı.
"O, vefat ett", - dedi qızı.
Bundan yarım saat evel Meşkova, babası, raatlıq künleri ekimlerniñ nezaretine qaldırılğanda soñ, reanimatsiyağa qoyuldı. Qızı, onı Krasnogorsk hastahanesinden Moskovağa avuştıracaq edi.
Krıminform matbuatı da Telegram kanalında Yuriy Meşkovnıñ Moskova hastahanesinde vefatı aqqında bildirdi.
"Evelce, Türkiyede raatlanğanda o, insult keçirdi, Rusiyege ketirilgeninden soñ, Meşkovnıñ ciddiy aqciger yanğısı tapıldı. Bir qaç künden soñ o yahşıca olıp başladı, amma bugün saba onı reanimatsiyağa qoydılar", - denile beyanatta.
Qırım.Aqiqat, Meşkovnıñ ölüminiñ tafsilâtını bilmege tırışa.
Sentâbrniñ 1-nde Yuriy Meşkovnıñ qızı Marianna babası insultqa oğrağanını Facebook saifesinde yazğan edi. Onı suniy komağa kirsetken ediler. Uyatqanda ise o, «laf etmey ve qıbırdamay edi».
1990-ıncı yıllarnıñ başında Yuriy Meşkov Qırımnıñ Cumhuriyet areketi ve «Rusiye» Blokunıñ yolbaşçısı edi, olar yarımadanıñ Ukrainadan mustaqil olmasına ve daa soñra Rusiye Federatsiyasına qoşulmasına qoltutqan ediler.
1994 senesi Qırımnıñ ilk ve soñki prezidenti olaraq saylanğan edi.
«Rusiye» blokundaki bölünüv ve Ukraina akimiyetiniñ areketleri neticesinde Rusiyege ketmege mecbur edi. Yarımada işğaline qadar anda yaşağan edi. Şimdi Kreml kontrolindeki Qırım akimiyetine muhalif ola.
