Kremlniñ nezaretinde olğan Qırım parlamentiniñ spikeri Vladimir Konstantinov, yarımadanıñ Ukraina qıtasından suv ve elektroenergiya teslimatına ihtiyacı olmağanını bildirdi. Bundan ğayrı o, «Ukraina suv ve energoblokadası içün cezasını çekecegini» de ayttı.
«Ukrainadan ne suv, ne elektroenergiya kerek degil. Ukraina Qırımğa qarşı yapqan cinayetleri içün cezasını çekecek. Ukrainanıñ Qırımğa qarşı tecavuzı 2014 senesinden berli toqtamay. Yarımadağa suv teslimatınıñ toqtatıluvını, energoblokadanı, LEP patlatuvını, istimal mallar teslimatınıñ toqtatıluvı, demiryol ve maşna qatnavı toqtatıluvını tecavuz aktı kibi sayamız. Bularnı Cumhuriyetimizge yapılğan büyük ziyanlar kibi qıymetlendiremiz, ondan vatandaşlarımız da eziyet çeke», – dedi Konstantinov.
Evel, Kremlniñ nezaretinde olğan Qırımnıñ başlıqları suv blokadası sebebinden yarımada körgen ziyanlar içün Ukrainağa qarşı dava açacaqları aqqında haber etilgen edi.
Biraz soñra Kremlniñ nezaretinde olğan Qırım parlamentini reisiniñ muavini Yefim Fiks suv blokadası ile bağlı davalar üç Ukraina vatandaşı Andrey Sençenko (o zaman Ukraina prezidenti müdiriyetiniñ reber müininiñ vazifesini vaqtındaj icra etken), Refat Çubarov (Qırımtatar Milliy Meclis reisi) ve Mustafa Cemilevge (Qırımtatar halqı milliy lideri) qarşı açılacağını bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
