Rusiye nezaretinde olğan Qırım akimiyeti yerli telekanalnıñ canlı yaynında Beşterek-Zuya suv borusınıñ areketke ketirilüvini ilân etti.
Tulumba stantsiyasını areketke ketirmege izin video bağ vastasınen Qırımnıñ Rusiye başı Sergey Aksönov berdi.
Keçenlerde, Beşterek-Zuya suv borusınıñ quruluv obyektinde «birinci quyu açılğanını bildirdiler. Şimdi savutlar toldurıla».
Müessisede qayd etkenlerine köre, suv yiberilüvi belgilenilgen vaqıttan evel olğan.
Власти Крыма уверяют, что запуск водовода даст Симферополю дополнительные 22 тыс. кубометров воды в сутки.
Qırımnıñ başlıqları, suv borusınıñ areketke ketirilüvi Aqmescitni künde qoşma 22 biñ kub metr suvnen temin etecek, dep inandıralar.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
