Link açıqlığı

Saatnıñ esas haberi

Qırımnıñ Büyük Onlar qasabasında qırımtatarlarnıñ evlerinde tintüvler keçirile – faaller


Qurman rayonınıñ Büyük Onlar (Oktâbrskoye) qasabasında qırımtatarlarnıñ evlerinde tintüvler keçirile. Bu aqta fevralniñ 14-nde «Qırım birdemligi» faalleri haber ete.

«Emirüseinov Reşat ve oğlu Rustemniñ evinde – Raboçaya soq., 125. Arsen Abhairovnıñ evinde – Abdennanova soq., 15. Abdulganiyev İzzet ve oğlu Eskenderniñ evinde – Zavodskaya soq., 16», – dep aytıla haberde.

Arsen Abhairovnıñ anası yaramadı. Oña «acele tibbiy yardım» çağırıldı.

Eskender Abdulganiyev ve Arsen Abhairov Aqmescitteki Rusiye FSBsi idaresine alıp ketirildi, dep bildire faaller.

«Qırım birdemliginiñ» bildirgenine köre, Reşat Emirüseinov – qırımtatar milliy areketiniñ iştirakçisi. 2017 senesi avgust ayında o, Server Karametovğa qoltutuv piketine çıqqan edi. Yazuvlı şiarında «Putin, balalarımız terrorist ve ekstremist degil» dep yazılğan edi. Daa soñra «Qırım birdemliginiñ» körüşüvlerine kelip, «Qırımda qırımtatarlarğa yapılğan basqığa qarşı çıqqanını açıq-açıq ayta edi».

Rusiye uquq qoruyıcılarınıñ saytlarında olıp keçkenler aqqında resmiy bir malümat yoq.

İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başladı.

XS
SM
MD
LG