Qırımnıñ Aqköz (Gornostayevka) köyünde Keriçteki ücüm neticesinde elâk olğanlardan biri, musulman Ruden Curayevniñ cenazesi qılına. Bu aqta Qırım.Aqiqat mühbiri oktâbrniñ 19-nda bildire.
«Bugün qardaşımız ve oğlumız Rudenni soñki yolğa ozğardıq. O, 2002 senesi dünyağa kelgen edi. Oğlançıq tek 16 yaşında edi, ayatında daa bir şey körip yetiştirmedi. Köyde onı pek seveler, köyde er kesnen eyi munasebeti bar edi. Adiy bir qorantada östi, anası ev bikesi, babası qurucı, olarnı acıyım. Ana-babalarınıñ balalarını defin etmesini körmek pek kederli bir şey. Eñ qorqunç şeydir», – dep tarif etti imam Munir Abhairov.
Onıñ aytqanına köre, Aqközli daa 5 talebe Keriç politehnik oquv yurtunda açılğan ateşte yaralandı, biri ağır alda.
Haber etilgeni kibi, Keriç politehnik kollecinde elâk olğanlarnen vedalaşuv merasimi şeerniñ merkeziy meydanında yekünlengen soñ naaşları mezarlıqqa ketirildi.
Cuma künü yerli kütleviy haber vastaları bildirdi ki, elâk olğanlarnıñ tuvğanları duyğularına dayanamayıp, Lenin meydanındaki vedalaşuv merasimini toqtatmağa rica ettiler.
Keriç politehnik kollecinde olğan kütleviy öldürüv qurbanlarınen vedalaşuv merasimine biñlernen insan keldi.
Keriç politehnik kollecinde kütleviy öldürüv qurbanlarınen vedalaşuv merasimi vaqtında Keriçte yollar qapatıldı ve cemaat naqliyatınıñ marşrutları deñiştirildi.
Şeerniñ Rusiye memuriyeti facia neticesinde 20 insan elâk olğanını bildirgen edi.
Patlav çarşenbe künü Keriç politehnik kollecinde oldı. Rusiyeniñ terrorizmge qarşı milliy komiteti, kollecde bomba patlağanını bildire.
Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi».
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
