Link açıqlığı

Saatnıñ esas haberi

Qırımnıñ advokatlar kollegiyası Rusiye Adliye nazirliginiñ talabını yerine ketirmeyip, Kurbedinovnı kollegiya erkânından çıqarmadı


Emil Kurbedinov
Emil Kurbedinov

«Qırımnıñ merkeziy advokatlar kollegiyası» Rusiye Adliye nazirliginiñ talabına uymayıp, advokat Emil Kurbedinovnı öz saflarından çıqarmağa razı olmadı. Bu aqta o, fevralniñ 22-nde Facebook saifesinde bildirdi.

«Kollegiya meni öz saflarından çıqarmamağa qarar aldı. Qırımnıñ Advokatlar palatasınıñ prezidenti Kançi Yelena Andreyevnağa printsipial ve küçlü qararı içün teşekkürler bildirem! Kollegiya reisi Velilâyev İslâm da sağ olsun! Maña qoltutqan er keske teşekkürler bildirem! Birlikte quvet!», – dep yazdı Kurbedinov Facebook saifesinde.

Daa evel haber etilgeni kibi, fevralniñ 22-nde «Qırımnıñ merkeziy advokatlar kollegiyası» prezidium toplaşuvını keçirip, Rusiye Adliye nazirliginiñ qırımlı advokat Emil Kurbedinovnı erkânından çıqarmaq talabını baqacaq.

2019 senesi yanvar ayında Rusiye Adliye nazirligi Kurbedinovnı 2019 senesi martnıñ 1-ne qadar «Qırımnıñ merkeziy advokatlar kollegiyasından» çıqarmağa talap etken edi.

Kurbedinovnıñ Qırım.Aqiqatqa bildirgenine köre, o, Rusiye Adliye nazirliginiñ onı advokatlar kollegiyasından çıqarmaq talabını şikâyet etecek.

Qırımlı advokat Emil Kurbedinovnı Rusiye uquq qoruyıcıları 2018 senesi dekabrniñ 6-nda tutıp aldı. Mahkeme onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden 5 künge apiske aldı. Kurbedinovnıñ zenaatdaşları dey ki, onı Suriye paytahtı Dimaşqqa köçken Qırım sakini şikâyet etti.

Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG