Qırımnıñ şimalindeki Aq-Şeyh (Razdolnoye) qasabasında qırımtatarlarnıñ evlerinde tahqiqat tedbirleri keçirile.
Bu aqta «Qırım birdemligi» cemaat teşebbüsi bildire.
«Faallerniñ ilk malümatına köre, Aqşeyhte qırımtatarlar Ernest Aliyev ve Server Bariyevniñ evlerinde tahqiqat tedbirleri keçirile. Bariyev – tiş tehniki. Aliyev – qurucıdır. Ekisi de din kütken musulmanlar», – dep aytıla haberde.
«Qırım birdemligi» qırımtatarı Osman Osmanovnıñ evinde de tintüv keçirilgenini bildire.
Faallerniñ malümatına köre, yasaqlanğan eşya ve edebiyat qıdırıldı, ofis malzemeleri baqıldı, bir şey tapılmadı ve alınmadı. Bariyevniñ evinde tintüv keçirilgende eki şaat bar edi, eki «gazel» ve yengil maşinanen kelgenler.
Al-azırda Qırımdaki Rusiye uquq qoruyıcıları ve politsiyası vaziyetni izaatlamay. Qırım.Aqiqat tafsilâtlı malümat almağa tırışa.
İşğal etilgen Qırımnıñ Bavurçı (Aqmescit rayonı) qasabasında 2018 senesi noyabrniñ 28-nde Rusiye uquq qoruyıcıları qırımtatarlar Emir ve Ruslan Murtazayevlerniñ evlerinde tintüv keçirgen edi. Rusiye uquq qoruyıcıları noyabrniñ 28-nde tintüvden soñ qırımtatarı Emir Murtazayevni alıp ketti.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
