Link açıqlığı

Tanılmağan Qırım Cumhuriyetiniñ prezidiumı qırımlılarnı Donetsk, Lugansk, Harkov sakinlerine «banderacılarğa qarşı» areketinde yardımcı olmağa çağırdı. Malüm ki, tanılmağan Qırım Cumhuriyetiniñ prezidiumında yolbaşçı vazifesini Vladimir Konstantinov eda ete.

Böyle bir muracaat tanılmağan Qırım parlamentiniñ saytında yerleştirildi.

«Qırımlılarnı Donetsk, Lugansk, Harkov ve Ukrainanıñ diger şeerleriniñ sakinlerine olarnıñ adaletli küreşi ve banderacılarğa qarşı areketinde iştirak etmege çağıramız», – aytıla beyanatta.

Qırım separatistleri «halq narazılığını toqtatmaq içün bir de bir küç areketlerini yañlış» dep sayalar, Ukraina uquq qorçalayıcılarınıñ bu regionlarda Rusiyege qol tutqanlarğa nisbeten işini ise «maydan areketçileriniñ repressiyaları» dep adladılar.

«Ukrainanıñ cenüp-şarqındaki vilâyetleriniñ sakinlerinen olarnıñ şeref ve deger, tuvğan til, kelecegini belgilemek aqqını qazanmaq içün küreşinde berabermiz», – dep aytıla beyanat metininde.

Qayd etmeli ki, bunıñ kibi sözler Qırım deputatları tarafından Qırım işğalinden evel de olğan edi.

Ukraina cenüp-şarqında Rusiyege qol tutuv mitingleri olıp keçti. Harkov ve Donetskte faaller «halq cumhuriyetlerini» ilân ettiler. Bugün Ukraina İçki işler naziri Arsen Avakov Harkovde terrorizmge qarşı tedbirler başlanğanını bildirdi.
XS
SM
MD
LG