Qırımlılar ukrain kütleviy haber vastalarınıñ haberlerini paylaşqanları içün Rusiye Devlet duması qabul etken yañlış malümat yasağı qanunına köre ceza ala bile.
Qırım aq qorçalayıcı gruppası bildirgenine köre, ukrain matbuatında derc etilgen Qırım haberleriniñ ekseriyetini Rusiye akimiyeti «şübheli malümat» dep adlandıra.
Aq qorçalayıcılarnıñ qayd etkenine köre, esas Ukrainada Qırım aqqında çıqqan bir çoq haber «vatandaşlarnıñ ayatı ve (ya da) sağlığı, cemaat nizamı ve (ya da) cemaat telükesizligi, yaşav, naqliyat ya da içtimaiy infrastruktura obyektleriniñ işini toqtatacaq ya da diger ağır aqibetlerge ketirecek doğru malümat olaraq tarqatılğan şübheli malümat» dep tanılması mümkün.
Aq qorçalayıcılarnıñ malümatına köre, bunıñ kibi maqalelerni paylaşqan Qırım sakinleri 30 biñden 100 biñ rublege qadar para cezasını ala bile; memurlar 60 biñden 200 biñ rublege qadar; şirketler ise – 200 biñden 500 biñ rublege qadar». «Memuriy bozuv nesnesi» ise musadere etilecek.
Haber etilgeni kibi, qanun qapalı gruppalardaki paylaşuvlar içün taqip etmege imkân bere.
Aq qorçalayıcılar, Rusiyeniñ yañlış malümat qanunında «doğru malümat olaraq tarqatılğan cemaat içün müim olğan şübheli malümat» nege köre qayd etilecek aytılmay, dep qoşa.
Aq qorçalayıcılarnıñ malümatına köre, Rusiyeniñ yañı qanunı er keske fikrini serbest şekilde bildirmege imkân bergen İnsan aqları Avropa konventsiyasınıñ 10-uncı maddesini boza. Bu aq devlet akimiyeti ya da devlet sıñırlarına baqmadan, öz fikrinde olmağa ve malümatnı ve ğayelerni alıp paylaşmağa imkân bere. Maddedeki sıñırlar devlette mustaqil adil mahkeme olsa ve tahqiqat mustaqil olsa qullanıla bile. Bundan ğayrı, Rusiyeniñ yañı qanunına köre qırımlılar Rusiye akimiyet organları, Rusiye timsallerine sayğısızlıq köstergeni içün ceza ala bile.
Martnıñ 7-nde Rusiye Devlet duması akimiyet organları, devlet timsalleri ve cemaatqa qarşı sayğısız ifadeler qullanuvı ve «yañlış» malümat paylaşuvı aqqında qanun leyhalarını soñki, üçünci oquvda qabul etti.
