Dekabrniñ 24-nde Aqmescitte faaller Qarasuvbazar rayon mahkemesiniñ «Taygan» arslanlar parkınıñ qapatılmasına dair ekinci qararına qarşı bir kişilik narazılıq aktsiyalarını keçirmege qarar aldı. Bu narazılıq aktsiyalarını daa çoq insan körsin dep, faaller olarnı Kreml kontrolindeki Qırım nazirler şurası bulunğan Qırım paytahtınıñ merkezindeki Lenin meydanında keçirdi.
Amma narazılıq aktsiyaları çoq devam etmedi. İlimler doktorı Gvozdoderov meydanğa «Tayganğa» qoltutuv yazuvlı şiarınen çıqqanınen birden yanlarına Aksenov bey efendiniñ şahsiy ordusından insanlar, lafta «halq opolçenleri» keldi. Olarnen beraber faalniñ yanına politsiya hadimleri de keldi. Bu «halq imayecileri» Gvozdoderovnı politsiya bölügine almağa istedi, amma, onıñ bahtına, Qırımnıñ Rusiye yolbaşçısınıñ matbuat konferentsiyasına Moskvadan da jurnalistler keldi, ve bazıları meydanda edi.
Birden «Rupor Moskvı» kanalınıñ mühbiri Tatyana kelip, video çıqarmağa başladı. Jurnalistniñ artından meydanda olğan faal aqmescitliler, blogerler yaqınlaştı. Faaller arasında cemaatçı ve siyasetçi Boris Lurye de bar edi. O, kirişip, politsiyadan vaziyetni qabartmamasını istedi.
«Siz turistik Qırımnı böyle areketlernen zaten «meşur ettiñiz», «Rupor Moskvı» er şeyni kösterir. Bir kişilik narazılıq aqqı er keste bar, şunıñ içün areketleriñiz qanunğa zıt kele», – dep bildirdi Lurye.
Politsiya hadimleri qurbanlarına qoltutqanlar olacağını beklemedi. Gvozdoderov vesiqalarını kösterip, «Qırım baariniñ» faal iştirakçisi, ilimler doktorı olğanını ayttı, politsiya hadimleri biraz yımşadı. Amma faaller Gvozdoderovnı qaldırmadı. Olardan biriniñ hatırlatqanına köre, bu sene baarde de Lenin meydanında politsiya hadimleri Qırımnıñ birinci prezidenti Yuriy Meşkovnı tuttı, soñra o üç künge mahküm etildi. Bunıñ qart adamnıñ sağlığına menfiy tesiri oldı, tezden o vefat etti.
Meydanda olğan «Krım24» Rusiye tarafdarı telekanalınıñ çekim taqımı «Rupor Moskvı» zenaatdaşlarından farqlı olıp, bir şey körmegenini ve eşitmegenini kösterdi. Faaller yanlarına barıp, olıp keçkenlerni ne içün çıqarmaylar dep sorasa, olar izaat bermege istemedi.
Politsiyanıñ Gvozdoderovğa yapqan basqı şaatı «Narodnoye slovo» kanalından bloger Konstantinov oldı, körgenleri onı şaşırdı. Onıñ aytqanına köre, Moskvada bile politsiya hadimleri siyasiy şiarları olmağan ve bir kişilik narazılıqlarğa çıqqan faallerge keder etmek ve olarnı tutmay.
«Politsiya hadimleri Rusiye qanunlarını boza. Bu insan bir şey yapmadı, yanına barıp, malümatını yazıp almaları mümkün edi, bu qadar, aktsiyasını devam etmesine imkân berilmeli edi», – dep bildirdi Konstantin.
Qayda oğrağanını ve mında qanunlar çalışmağanını körgen Konstantin faallerden dağılmalarını rica etti, çünki politsiya hadimleri olarnı qanunsız miting dep ilân ete bilecegini añladı. Bu alda «nizam qoruyıcıları», asılında ise akimiyet qaravulları, repressiyalarnı tolusınen işlete bilir edi. Tahminen bir saat devam etken qavğadan soñ politsiya hadimleri faallerge Gvozdoderovnı alıp ketmege imkân berdi.
Aqlıma «tuvğan gavandan» evelki zamanlar keldi, o vaqıt Rusiye tarafdarı faaller bütün Qırımda, hususan Lenin meydanında, aktsiya, miting ve diger tedbirlerni serbest keçirgen edi. Nesini begenmey ediler? Olarnı kimler aqsımlağan edi? Şimdi ise «Rusiyeniñ Qırımında» «serbest ava» ala. Amma sıranen yürmege istemeseler, politsiya tayaqları qaburğalarına urar. Amma rus ata sözünde aytılğanı kibi, «ursa – sevedir»…
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün