Link açıqlığı

Saatnıñ esas haberi

Qırımlılarnıñ mektüpleri: Mevsimni açmaq mümkün degil qapatmaq


Balıqlava, Kümüş plâjı
Balıqlava, Kümüş plâjı

Mayısnıñ 8-nde yañı koronavirus yuqunçı ile küreş operativ ştabınıñ toplaşuvında Sergey Aksenov bu sene Qırımda kurort mevsimi olmaycaq, dep bildirdi. Faqat qırımlılarnıñ ve qomşu Rusiye sakinleriniñ bunıñnen bağlı başqa planları bar.

Şifahane ve musafirhaneler yerli akimiyetniñ kontroli altında olsa, şahsiy sektor saipleri bütün kurort kârından marum qalmağa azırlanmay. Malüm ki, Qırım yalı boyunıñ bir çoq sakini yazda yazlıq evlerine, yaz aşhanelerine ve farqlı yerlerge keçe, evlerini ise künlik kiralıqqa bereler. Amma bu sene künlik kiralıq problemi olacağını añlap, bir çoq şahsiy ev saibi daire ve evlerini bir ayğa 50-60 biñge kirağa bere, kira eñ az 2-3 ay olacaq şartı qoyula. Yalı boyundaki tanışlarımnıñ aytqanına köre, rusiyeliler böyle variantlarnı alıp, Qırımğa büyük cemidanlarnen kelip başlay, bütün yaznı mında keçirmege niyetleneler. Moskvalı ya da şimal sakinleri içün 50-60 biñlik kira nedir? Olarnıñ kârlarına köre çoq para degil, qırımlılar içün ise qoranta bücetlerine büyük destek ola.

Uzaqtan çalışqan bir çoq rusiyeli Qırımğa yol aldı, dep aytalar

Uzaqtan çalışqan bir çoq rusiyeli Qırımğa yol aldı, dep aytalar, olar içün gazlarnen bulaşqan şeerlerde degil, Qırımda «özüni izolâtsiya etmege» daa meraqlıdır. Olarnı Qırımğa kelip, sağlıq vaziyetleri kontrol etilecek 14 künlik observatorğa oğraycaqları da qorquzmay, çünki yaznı deñizde yaldap, Qırım küneşi altında oturıp ve sırf Qırım meyvalarını aşap keçirmege istey. Qabarlar da lâğu etilmedi. Şahsen men Rusiyeden Qırımğa kelgen er kes izolâtorğa yollanğanından şübhelenem, olar endi rıqma-rıq tolu olur edi, bir künde Keriç köpründen eki biñge yaqın maşina kire.

Sergey Aksenovnıñ ştab toplaşuvında aytqanına köre, bu vaziyette eki afta devlet parasına Qırımda yaşamağa istegen rusiyeliler tezden kele bile. Ne içün olmasın? Anda bir qarar aşatalar, Aksenovnıñ bildirgenine köre, şikâyetlerden soñ aş daa yahşı oldı. Observatorlar esasen şifahaneler esasında açıldı, temiz deñiz avası da bar. Bedava kurort yollanma degilmi?! Rusiyeliler bunı daa añlamadı, añlasa, çoq kişi kelecek, hususan parası az olğanlar!

Qırımnıñ yalıdaki mesken yerlerinde yaşamağan qırımlılar içün mevsim kerçekten olmaycaq, ğaliba.

Qoyulğan GİBDD noqtaları bunı kontrol ete. Yüksek seviyeli azırlıq rejiminiñ sıñırlavlarını bozğanlarğa ciddiy para cezaları berile, şunıñ içün çoqusı qırımlılar koronavirusqa oğramaqtan degil, para cezası almaqtan qorqa. Amma bir paradoks bar – şeer soqaqlarında virusqa oğrav telükesi tabiatta hastalanmaqtan qat-qat yüksektir. Amma tabiat ve deñizge barmağa olmay, Qırım yolbaşçısı izin bermey.

Aynı vaqıtta, parasız qalğan halq uydurmağa bile» İlân saytlarında «subetçi», «içki arqadaşı» teklifleri peyda oldı, «özüni izolâtsiya etüvniñ» neticeleri budır. Maña bu ilânlarnı köstergen tanışım meraqtan «içki arqadaşına» telefon etkenini ayttı, külerüzlü bir genç çıqtı, bir özü qalğan qadınlar onıñ hızmetlerinden çoq faydalana, dep bildirdi. Şu sebepten Qırımğa kelgen rusiyeli qadınlarnıñ yaz aqşamlarını keçirecek adamları bar.

Aqmescitte boş qalğan student yataqhaneleri ise toldı… furun böceklerinen. Studentler yataqhanelerden o qadar tez çıqarıldı ki, bir çoqu odalarında aş qaldırıp ketti. Furun böcekleriniñ bolluğı bar. Rusiyeliler içün observator deñiz yalısında degil, mında yapılmalı.

Öyle de yaşaymız, yarın ne olacağını bilmeymiz. Amma Qırımda tek özüne ve yaqınlarına ümüt etmege mümkün olğanını añlaymız. Bizni izolâtsiya etken akimiyet ise halq içün qasevetlenmey, mevsim olacaq-yoqmı olar içün müim degil – özüne öyle de mukâfat berirler!

Bu künleri tükândan qaytqanda «Yedinaya Rossiya» urbasında eki genç insannı kördim, maña Georgiy şeritini berecek oldılar, men de şerit maña kerekmey, bedava maska berse ediñiz dedim, amma yoq, bedava tek şeritler berile, dep cevap bergenler…

Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

XS
SM
MD
LG