Salı künü, mayısnıñ 7-sinde ilhaq etilgen Qırımda, Ekinci cian cenkinde ğalebeniñ 74 yıllığına bağışlanğan, “Ğalebe diktantı” Rusiye aktsiyasını keçirecekler. Bu aqta Kreml nezaretindeki Qırım tasil Nazirligi haber etmekte.
Bildirilgenine köre, aktsiya ilhaq etilgen Qırımnı ve qomşu Rusiyeniñ bütün bölge merkezlerini qaplaycaq.
“Diktant 20 sualden ibaret olacaq, olarnı Rusiye devlet gumanitar universitet işlep çıqaracaq. Vazifeler cenk tarihi, onıñ qaramanları ve “Ğalebe künü”nen bağlı olacaq”, - denile beyanatta.
Qırımda üç merkez çalışacaq: Aqmescitte - V.İ.Vernadskiy adına Qırım federal universitet, Keriçte - “Mektep - Deñiz tehnikiy litseyi”, Kefede - Merkeziy kitaphane.
Diktant saat 13:00-da başlanacaq, vazife becermesine 45 daqqa berilecek. “Ğalebe diktantı”nıñ yekünleri Rusiye Kününe, yani iyün 12-sine qadar çıqarılacaq.
İlhaq etilgen Qırımda 2014 senesinden soñ, “Ğalebe künü” - Qızıl ordu ve sovet halqınıñ natsist Almaniya üzerinde yeñiş bayramı kibi -sovet ve Rusiye bayramı qutlana. Ukrainada mayısnıñ 8-inde Hatıra ve barışıq Künü qayd etile, mayısnın 9-ında ise - Ekinci cian cenkinde natsizm üzerinde ğalebe Künü.
