Qurucılığı bitmegen obyektleri olğan işğal etilgen Qırım sakinleri olarsız qalmaları mümkün, dep bildirdi Qırımnıñ Rusiye parlamenti mal-mülk ve topraq munasebetleri komitetiniñ yolbaşçısı Yevgeniya Dobrınâ.
Memurnıñ aytqanına köre, qırımlılarnıñ 2020 senesi yanvarniñ 1-ne qadar mal-mülkini qanunlaştırmaq içün akimiyetke ariza bermege imkânı bar edi.
«Akimiyet vatandaşlarğa özü de bardı ve obyektlerni resmiyleştirmege teklif etti, faqat er kes bunı yapmağa razı olmadı. Muracaat etemiz – bizge kerekmey, dep cevap bereler! Vatandaşlarğa basqı yapmağa olmaz da», – dep bildire aytqanlarını «RİA Krım» Rusiye neşiri.
Memurnıñ qayd etkenine köre, «işke qulaq asmağanlar» mülksiz qala bile.
«Bu belediye organlarınıñ işi, qurucılığı bitmegen binalar olsa, memuriy resurs olacaq, mahkemege muracaat berilecek ve bu bina yıqtırıla bile», – dep ayttı Rusiye parlamentiniñ vekili.
Rusiye kontrolindeki Qırım yolbaşçısı Sergey Aksenovnıñ aytqanına köre, politsiya ve prokuratura yarımadada «qanunsız binalarnı yoq etüv işinde vekâletli şahıslar ve kontrol etken organlarnıñ areketsizligi sebebinden» memuriy davalar açacaqlar.
Yaltanıñ Rusiye memuriyeti, şeerde yüzge yaqın temelli bina ve 500 garaj, qora ve aran yıqılmalı, dep bildirdi.
2019 senesi avgust ayında bildirilgenine köre, 2020 senesi Qırım akimiyeti «izinsiz qurulğan inşaatlarnı yıqacaq» yekâne müessiseni qurmağa niyetlene, buña tahminen 80 mln ruble ayırılacaq.
