Vaqtınca işğal etilgen topraqlarnıñ reintegratsiya meseleleri nazirligi bildirgenine köre, «Diya» elektron qullanımında memleket içinde köçip kelgen şahıs vesiqasınıñ elektron şekli olacaq.
Bundan evel bu vesiqa tek kâğıtta bar edi, amma artıq elektron şekli de bar.
«Memleket içinde köçip kelgen şahıs vesiqasını talap etken yerge kâğıtsız köstermek mümkün. Memleket içinde köçip kelgen şahıs olaraq qayd etilgen aman-aman 1,5 million ukrainalınıñ ayatını qolaylaştıracaqtır. Devletniñ paperless yolunda müim bir adım», – dep qayd etti Ukrainanıñ vaqtınca işğal etilgen topraqlarnıñ reintegratsiya meseleleri naziriniñ muavini Snaver Seythalilev.
Qayd etilgenine köre, «Diya» qullanımında daa evel alınğan kâğıt vesiqasınıñ bütün malümatları olacaq.
Daa evel berilgen malümatqa köre, 2023 senesine qadar vatandaşlarğa, şu cumluden işğal etilgen Qırım sakinlerine kösterilgen hızmetlerni ağğa taşıycaqlar. Başta bankta ya da akkreditatsiyası olğan diger merkezde elektron imzanı almaq kerek. «Diya» qullanımından faydalanıp, doğuv şeadetnamesi, ID-kartı, çetel pasportı, aydavcı şeadetnamesi, pension şeadetnamesini ve ilâhre almağa mümkün olacaqtır.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
