Yuqarı Radanıñ insan aqları vekâletlisi Lüdmila Denisova bildirgenine köre, Qırımdaki «Hizb ut-Tahrir davalarınıñ» mabüsleri Cemil Gafarov ve Enver Ömerov SİZOda antisanitar şaraitlerde tutula. Birincisi Aqmescitte, ekincisi qomşu Rusiyeniñ Rostov vilâyetinde buluna. Onıñ aytqanına köre, tahqiqat izolâtorında qırımlılarğa tibbiy yardım etilmey.
«Tuvğanlarınıñ aytqanına köre, II derece saqatı Cemil Gafarov hronik hastalıqları birden ağırlaştı, dep şikâyet ete. Ayaqlarda tutuluvlar, yürek ağrısı ve qan basımı raatsızlay. Enver Ömerovnı raat yürmege bermegen adale-iskelet ağrıları raatsızlay», – dep yazdı Denisova Facebookta.
Ukraina ombudsmeniniñ qayd etkenine köre, qırımlılar rıqma-rıq tolu kameralarda tutula. Onıñ aytqanına köre, Cemil Gafarov daa 10 insan yatqan kamerağa yerleştirildi, lâkin anda tek altı töşek bar.
«Kameralarda antisanitariya – furun böcekleri ve qandalaylar çoq. Apishane memuriyeti sanitar tedbirler almağanı içün tuvğanları dihlofos ve bu «ayvanlarnen» küreşmek içün diger vastalarnı yollamağa mecbur. Amma olar pek çoq, vatandaşlarımız bu problemni özleri çezip olamay artıq», – dep bildirdi ombudsmen.
Onıñ aytqanına köre, BM İqtisadiy ve içtimaiy şurası tasdıqlağan mabüsler ile munasebet qaideleriniñ 9,10, 22-nci maddesi ve Avropa insan aqlarını ve esas serbestliklerini qoruv konventsiyasınıñ 3-ünci maddesi bozula.
Denisova, Rusiye insan aqları vekâletlisi Tatyana Moskalkovağa muracaat etip, qırımlılarğa kerekli tibbiy yardım kösterilüvine yardım etmesini ve tutuv şaraitlerini teşkermesini istedi.
Rusiyeniñ Cezalarnı yerine ketirüv federal hızmeti ve Rusiye ombudsmeniniñ vekilleri Denisovanıñ malümatını izaatlamadı.
Cemil Gafarov – Aqmescitteki ekinci «Hizb ut-Tahrir davasınıñ» mabüslerinden biridir. 2019 senesi mart ayında tutuldı. Enver Ömerov – Qarasuvbazardaki «Hizb ut-Tahrir davasınıñ» mabüsi, 2019 senesi iyün ayında tutuldı. Rusiye FSBsi olarnı «Hizb ut-Tahrir» bölüginde iştirak etkenlerinde qabaatlay.
Qırımlılar bütün qabaatlavlarnı inkâr ete, Ukraina Tış işler nazirligi ve halqara teşkilâtlar Rusiyeni yarımada sakinleriniñ taqibini toqtatmasına çoq çağırğan edi.
