Link açıqlığı

Saatnıñ esas haberi

Qırımlılar Cemilev, Çiygoz, Umerov ve Bogutskaya Radağa keçti


Ukraina Yuqarı Radasınıñ binası

Qırımtatar halqınıñ lideri Mustafa Cemilev, Qırımtatar Milliy Meclisiniñ reis muavini Ahtem Çiygoz, Qırımtatar Milliy Qurultayınıñ delegatı Rustem Umerov, qırımlı bloger ve dizayner Yelizaveta Bogutskaya Ukraina Yuqarı Radasına siyasiy firqalarnıñ cedvelleri boyunca keçti.

Yuqarı Rada saylavlarında protokollarnıñ 100%-ını teşkergen Ukraina Merkeziy saylav komissiyasınıñ malümatına köre, Cemilev ve Çiygoz Ukrainanıñ beşinci prezidenti Petro Poroşenko yolbaşçılığında «Yevropeyska solidarnist» («Avropa birdemligi») firqasınıñ Ukraina halq deputatları ola, Umerov – Svâtoslav Vakarçuknıñ «Ğolos» («Ses») firqasından, Bogutskaya – prezidentniñ «Sluğa narodu» («Halq hızmetçisi») firqasından.

Bundan ğayrı, Qırım Muhtar Cumhuriyeti Yuqarı Şurasınıñ sabıq deputatı Nestor Şufriç ve Qırım Muhtar Cumhuriyetiniñ sabıq maliye naziri Nikolay Skorik halq deputatları ola. Ekisi de «Opozıtsiyna platforma – Za jıttâ» («Muhalifet platforması – Ayat içün») cedveli boyunca keçti.

İyülniñ 26-nda Ukraina Merkeziy saylav komissiyası iyülniñ 21-nde olıp keçken nevbetten tış parlament saylavlarında protokollarnıñ 100%-ını teşkerdi.

Bu malümatqa köre, «Sluğa narodu» reylerniñ 43,16%-ını (6 307 097) qazana, «Opozıtsiyna platforma – Za jıttâ» – 13,05% (1 908 087), «Batkivşçına» – 8,18% (1 196 258), «Yevropeyska solidarnist» – 8,1% (1 184 475), «Ğolos» – 5,82% (851 669).

Qalğan firqalar parlamentke kirmek içün kerek olğan 5%-dan az aldı. Merkeziy saylav komissiyasınıñ malümatına köre, saylayıcılarnıñ 49,84%-ı rey berdi. Bu raqam Ukraina parlament saylavlarında saylayıcılarnıñ faaligine köre eñ alçaq oldı.

Ukrainadaki saylavlar. Namzetler Qırım içün ne yapacaq ola? (video)
Bekleñiz, lütfen

No media source currently available

0:00 0:22:49 0:00

Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).

Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).

Bir vaqıtları Qırımnıñ icra organlarında çalışqan ve Qırım Muhtar Cumhuriyetiniñ Yuqarı Rada deputatları olğan bir sıra ukrain siyasetçisi (Aleksandra Kujel, Nikolay Skorik, Nestor Şufriç ve digerleri) namzetini kösterdi.

XS
SM
MD
LG