Qırımlılar bir afta tatilini nasıl keçireceklerini tarif etti (video)

Rusiyede martnıñ 30-ndan aprelniñ 5-ne qadar afta tatil olacaq. Bu qarar Kreml yolbaşçısı Vladimir Putinge aittir: bunı koronavirus yuqunçı sebebinden yaptı. «Şimdi eñ telükesiz şey – evde qalmaqtır», – dep ayttı Rusiye prezidenti. Putinniñ qararı işğal etilgen yarımadağa da tesir ete. İçtimaiy añlarda bu teşebbüske em müsbet, em menfiy yanaşqanlar oldı. Qullanıcılar Putinni daa ciddiy tedbir – karantin ya da fevqulâde vaziyet – olmağanı içün tenqit etip, bir aftalıq tatil şahsiy bizneske nasıl bir zarar ketirecek dep muzakere etti. Yarımada sakinleri bu aqta ne tüşüne? Qırım.Aqiqat, Aqmescit soqaqlarına çıqıp, yerli sakinler bir afta tatilini nasıl keçirecekler, dep soradı.