Kreml kontrolindeki Qırım akimiyeti qırımlılarnıñ mezarlıq ziyaretlerini sıñırlamağa qarar aldı.
İşbu qarar Qırımdaki Rospotrebnadzor idaresiniñ reberi Natalya Penkovskayanıñ ricasınen qabul etildi. O, bunı Qırımda koronavirus yuqunçınıñ tarqaluvına qarşı operativ ştab toplaşuvında bildirdi.
Qırımnıñ Rusiye yolbaşçısı Sergey Aksenov bu teklifke qoltuttı.
«Yahşı, bu müddet içün. Baqarmız… bütün subyektler böyle qararlar aldı. Qırımlılardan buña añlayışlı yanaşmasını rica etemiz. Patriarh Kirillniñ muracaatını köremiz… Pashada bile bütün ibadetlerniñ evde yapılmasını rica eteler», – dedi Aksenov.
Qırımda aprelniñ 11-nde daa bir koronavirus hastası qayd etildi. Yalta sakini hastalandı. Umumen Qırımda 29 COVID-19 hastası bar.
Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
