Rusiye tarafından 13 yılğa mahküm etilgen qırımlı Server Zekiryayevniñ, ükümni çekken Tula vilâyetiniñ 1-nci tüzetüv koloniyasından evine yaqınlaştırmasını red ettiler. Bu aqta "Qırım birdemligi"ne onıñ ömür arqadaşı Zarema Zekiriyeva bildirdi.
Qayd etilgenine köre, 2022 senesi sentâbr ayında Novoçerkassk SİZO-sından çıqqan soñ qırımlı daima SİZO-ğa yerleştirile. Bundan da ğayrı, Zekiryayevniñ qorantasına onı körmege bermeyler. Ailesi ile soñki sefer 2023 senesi sentâbr ayında körüşken.
"O, mahsus kamera odasında bulunğanına esaslanıp, kene uzun müddetli körüşüvni red ettiler. Bir buçuq yıldan berli tuvğan adamımıznı körmedik ve eşitmedik. Tek mektüpler vastasınen bağlanamız, o da tsenzuranıñ diqqatlı teşkerüvinden soñ", — dep bildirdi Zarema.
Daa evel Zekiryayev Rusiye koloniyasındaki işkence şaraitleri aqqında tarif etken edi. Qayd etilgenine köre, apishanede muntazam sürette tintüvler keçirile, tuvğanlarına, oña advokat yollamalarını rica etken mektüpler ise berilmey.
2017 senesi oktâbr ayında Rusiye quvetçileri Bağçasaraynıñ altı sakinini yaqaladı. Bu Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. Rusiye FSB-si onı Rusiyede yasaq etilgen "Hizb ut-Tahrir" teşkilâtında iştirak etkeni ile qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
