Cumaertesi künü, aprelniñ 20-nde, Aqyarda belli qırımlı yaldayıcı Oleg Sofânik qırımtatar halqı sürgünliginiñ 75 yılı munasebetinen yaldav kerçekleştirdi.
Bu aqta qırımlı bloger Zair Akadırov Facebookta haber etti.
«1944 senesiniñ sürgünligi – zalım Stalin ve omuzdaşları kerçekleştirgen cefakeş qırımtatar halqınıñ qorqunç faciasıdır. İnsanlarnı ölümge yolladılar. Bir daa böyle bir şey tekrarlanmasın. Bu yaldavnı halq sürgünliginiñ 75 yılına bağışlayım», – dep bildire Sofânikniñ aytqanlarını bloger.
Akadırovnıñ haber etkenine köre, yaldav vaqtında ruzgâr ese edi, ava arareti ise +10 derece edi. Sofânik 1 km mesafeni batterflây üslübinde yaldadı.
Aqyardaki «Uşakova balka» plâjında finişke çıqtı.
Zair Akadırovnıñ qayd etkenine köre, Sofânik büyük mesafege, misal içün, Qırımdan Türkiyege yaldamağa azır. Amma bunıñ içün sermiya toplamağa ve sıñırnı keçmek içün izin almağa kerek.
Qırımtatar halqını Qırımdan sürgün etüvniñ qurbanlarını añma künü er yıl mayısnıñ 18-nde qayd etile. 1944 senesi mayısnıñ 18-nde qırımtatarlarnen toldurılğan birinci eşelon yarımadadan Orta Asiyağa yollanğan edi. Umumen 180 biñden ziyade kişi sürgün etildi.
