19 yılğa mahküm etilgen Qırımlı cemaat jurnalisti Remzi Bekirovğa Abakan şeerinde 33-ünci Rusiye cezahanesinde namaz qılmağa izin bermeyler. Bunı "Qırım birdemligi"ne advokatı bildirdi.
Al-azırda qırımlı 2024 senesi boş ayda yerleştirilgen sert tutuv şaraitlerinde buluna. Bu bölük binanıñ ekinci qatında yerleşe edi, anda video kameradan "kör alanı" bar edi ve musulmanlar namaz qılıp ola edi. İlk qış ayında SUS binası birinci qatnıñ başqa bir yerine avuştırıldı.
"Bir müddet devamında anda namaz qıla ediler, soñra SİZO-ğa kütleviy şekilde yerleştirmege başladılar", — dep tarif etti imayeci.
Remzi Bekirov, namaz qılğanı içün ŞİZO-ğa yerleştirilgenine şikâyet etip, cezahanege qarşı dava açtı. Amma Rusiye mahkemesi qırımlınıñ areketlerinde "kündelik tertip bozulğanını" qayd etti, bundan soñ SU-te ekinci kamera qoyuldı, ve kör alanlar yoq oldı.
"Evel ayaqta turıp namaz qılğanı içün ŞİZO-ğa yollanılsa, şimdi oturıp oquğanına baqmadan, onı anda yollaylar. Namaz qılmağa asla bermeyler", — dep ayttı Bekirovnıñ ömür arqadaşı.
Advokatnıñ aytqanına köre, jurnalist ŞİZO-dan soñki sefer çeçek ayınıñ 24-nde çıqqan edi.
2019 senesi saban ayında Rusiye quvetçileri Qırımda qırımtatar faalleriniñ, hususan "Qırım birdemligi" cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi saban ayınıñ 27-nde ve 28-nde Aqmescitteki Rusiye makemesi tutulğanlarnı apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
