İşğal etilgen Qırım sakinleriniñ aqlarını qorçalağan uquqçı Lilâ Gemeci advokat statusını aldı. Bunı o, yanvarniñ 18-nde Qırım.Aqiqatqa bildirdi.
«İmtiannı daa sentâbr ayında bergen edim. Tünevin, yanvarniñ 17-nde, şeadetname aldım. Qorçalamağa planlaştıram. Oğraşacaq davalarımnı daa muzakere etmedik. Amma bu printsipial degil. Er angi davanen oğraşmağa azırım. Şimdi order almaq kerek. Amma bu tehnik mesele», – dep tarif etti Gemeci.
2018 senesi oktâbrniñ 27-nde «Qırım birdemliginiñ» toplaşuvında Rusiye uquq qoruyıcıları advokat Edem Semedlâyev, uquqçı Lilâ Gemeci ve «Qırım birdemligi» cemaat birleşmesiniñ koordinatorı Dilâver Memetovnı ekstremizm ve terrorizm saalarındaki qanunlar bozulmaycaq, dep ihtar etken edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
