Rusiye tarafından casuslıqta qabaatlanğan qırımtatar, Ukrayina vatandaşı Leniye Ümerova Rusiye apishanesinden yañı mektüp yazdı. Onı qırımlınıñ qardaşı Aziz Ümerov derc etti.
Mektüpte o sağlıq vaziyeti, yaşayışı ve Moskvadaki "Lefortovo" SİZO-sında nasıl vaqıt keçirgeni aqqında tarif ete.
"Bu afta yañı bir şeysiz keçti, er şey tınç. Kamerağa bir özüm ve sesimni coymamaq içün yüksek sesnen oquyım. Bekciler, bu kimnen laf ete dep, qapu közçiginden baqalar", — dep yazıla mektüpte.
Qız soñki vaqıtları, hususan amamdan soñ, başı aylanğanından şikâyet etti
"Kezinti vaqtında, propaganda açılğanda, başım ağırmağa başlay, eminim ki, bu işte menim demirimniñ faydası yoq. Ve saçlarım pek töküle, olarnı, elbette, biraz kesmek kerek, amma mında bu gigiyenik olğanından emin degilim, özüm ise yapıp olamam. Şunıñ içün şimdilik olarğa qulaq asmayım, töküle bersinler, saçımnı örem", — dep yazdı qırımtatar.
O şimdi yapon felsefesini oquğanı ve soñki künleri "Maña gece resimini yap" yırını yırlağanı aqqında da yazdı.
"Menim davamda şimdi yañı taqiqatçı ve yaqında onen tanışuvğa barıp keldim. Müim bir şey yoq, amma esas mahkeme tahminen küzde olacağını ayttı. Em de mahkeme Kavkazda degil de, Moskvada olacağını ayttı, amma men bundan 100% emin degilim", — dep qayd etti qız.
2022 senesi dekabr ayında 25 yaşındaki Leniye Ümerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Ümerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Üç aydan soñ onı yibergenler, lâkin birden Leniyeni polis patruli vesiqaları olmağanı içün tuttı, dep tarif ete ağası. Rusiye mahkemesi onı 15 künge apiske aldı. Soñra Leniyege qarşı daa eki protokol tizildi.
2023 senesi mayısnıñ 5-nde Moskvanıñ Lefortovo mahkemesi Ümerovanı casuslıqta qabaatlap apiske aldı.
2024 senesi mayıs ayında Rusiye uquq qoruyıcı leyhası Leniye Ümerovanı siyasiy mabüs olaraq tanıdı
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
