Rusiye koloniyasında tutulğan ve anda koronavirusqa oğrağan Aqmescitteki «Hizb ut-Tahrir davasınıñ» mabüsi Teymur Abdullayevniñ ceza izolâtorında qaluv müddeti yanvarniñ 22-ne qadar uzatıldı, dep bildirdi apiske alınğan qırımlınıñ anası Dilâra Abdullayeva «Ukrinform» agentligine.
«Kiçik oğlum Teymurnen saat 17:00-da resmiy qısqa subetim oldım. Ceza izolâtorında buluna, cezası yanvarniñ 22-ne qadar uzatıldı! Teymur endi sebebini bile soramay. Faydası yoq dey, qabaatsız olğanını isbatlamaq imkânsız», – dep tarif etti Abdullayeva.
Onıñ malümatına köre, oğlunıñ alı alâ daa zayıf ve öksürmege devam ete, közleri de yaramay köre. Erkek oqumaq içün közlük yollamağa rica ete. Qadınnıñ aytqanına köre, oğluna koloniyağa yollanılğan ilâc ve vitaminler daa yañı yıldan evel keldi. Amma Teymurğa berilmedi.
Onıñ aytqanına köre, oğlunıñ aşı – «suvlu şorba ve suvnen ötmek». Ceza izolâtorı kamerasında bir özü degil, şimdi anda dört kişi buluna.
Qırımlı tutulğan Başkortostan koloniyası Teymur Abdullayevniñ ceza izolâtorında tutulğanına dair malümat bermey.
Dekabrniñ ortasında tuvğanları Abdullayev kene ceza izolâtorına qapatıldı, dep bildirgen edi.
Abdullayev tahminen beş ay ceza izolâtorında tutuldı, soñra onı sert şaraitli kamerağa avuştırğanlar.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
