Ukrayina prezidenti Volodımır Zelenskıy ''26-2-14: Cenk Qırımda başlandı'' forumında video muracaatınen çıqışta bulundı.
''Qırımnı unutmağan, Qırım içün ğayretlerimizni desteklegen er keske teşekkürler. Arbiylerimizge yardım etkenler. Qırımda işğalcilerge qarşı küreşkenler. Öz ruhunı Rusiye yamanlığına teslim etmegenker. Rusiye rejimi tarafından basqılarğa oğratılğan insanlarnı azat etmege yardım etken, bu insanlarğa qol tutqan ve olarnıñ adaletke, onıñ quvetine ve Ukrayinağa olğan inançlarını saqlağanlar. Bütün esirlerimizniñ qaytarılması, Ukrayinadan sürgün etilgenlerniñ qaytarılması, Qırım siyasiy mabüsleriniñ qaytarılması bizim esas vazifemizdir. Ve bizge yardım etken bütün memleketlerge minnetdarım", - dedi Zelenskıy.
Onıñ aytqanına köre, 2014 senesi fevralniñ 26-ndan bugünge qadar çoq şey deñişti, ve er kes bu büyük deñişmelerniñ yönelişini añlay. Zelenskıy qayd etti ki, Ukrayina bu cenkni "öz şartlarında" bitire bile, em de toprağını ve adamlarını işğalden qaytarıp, Rusiyeni "adaletli mesüliyetke çeke bile''.
Fevral 26 künü Qırım Muhtar Cumhuriyeti ve Aqyar şeeriniñ işğaline qarşı tirenüv kününde ''26-2-14: Cenk Qırımda başlandı'' forumı çalışıp başladı, mında Rusiye tarafından ilhaq etilgen Qırımda yaşağan Ukrayina vatandaşlarınıñ küreşi ve qarşılığı muzakere etile.
Ukrayina prezidentiniñ Qırım Muhtar Cumhuriyetindeki temsilciligi bildirgeni kibi, tedbirniñ maqsadı - 2014 senesi Qırım işğalinden başlap Rusiye istilâsı devam etkenini hatırlatmaq ve qayd etmek. Forum vaqtında, hususan, işğal etilgen Qırımda yaşağan ve qıtaiy Ukrayina ile birdemlik köstergen ve Ukrayinanıñ bütün ordusını beklegen Ukrayina vatandaşlarınıñ küreşi ve tirenüvi mevzusı köterilecek.
Fevralniñ 26-nda cemaatçılıq tarafından teşebbüs etilgen Qırımnıñ Rusiye işğaline qarşı tirenüv künü qayd etile. Bu künü Ukrayinada ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşalar, forumlar, mitingler, yürüşler keçirile.
2014 senesi fevral 26-da QMC Yuqarı Radasınıñ binası ögünde Ukrayinanıñ topraq bütünligine qoltutuv mitingi olıp keçti. O vaqıt miting iştirakçilerine Rusiye tarafdarları, şu cümleden "Rusiye birligi" firqasından olğan faaller qarşılıq köstergen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
