Ukraina prezidenti Volodımır Zelenskıy, Kreml ukrain siyasiy mabüsleriniñ, olarnıñ arasında Qırım sakinleri de, Rusiye esirinden azat etilmesine "mania" olğanını bildirdi.
Bunı o, Qırım.Aqiqat ve Ukraina mustaqilligi künü ve "Qırım platforması" saamitiniñ keçirilüvi arfesinde "Qırımnı nasıl etip qaytarmaq" mahsus mültimediya leyhası etrafında birleşken Qırımdan ukrain jurnalistlerine bildirdi.
«Ombudsmanımız sayesinde bütün cedveller azır. Bu cedveller azır olğanından ğayrı, başqa bir şey bilmeyim. Bugünde, bu meseleni çezmek içün Rusiye prezidenti ile vastasız aytışuvlar kerek, başqa yolnı körmeyim. Diger variantlar, menimce, "Qıırm platformasında" azırlanmaq kerek. Bu pek müim sual. Ve o tamamınen toqtatılğan», ‒ dedi Zelenskıy.
O qayd etti ki, Ukraina deñişüv keçirmek azır, amma Rusiye prezidenti Vladimir Putinniñ de ıntılışı olmaq kerek.
«Rusiye prezidenti bugün bizim adamlarımznı qaytarıp ola, olarnı siyasiy mabüs kibi tanımasa bile. Biz, bizim Qırım sakinlerimizni qaytarmaq içün er angi deñişüv, er angi adımğa azırmız», – dedi devlet başı.
Hatırlatamız, avgustnıñ 9-nda Ukraina prezidenti Volodımır Zelenskıy Qırım jurnalistlerine intervyü berip, "Qırım platforması" halqara sammitiniñ arfesinde yarımadanıñ kelecegi ile bağlı suallerge cevap berdi.
Volodımır Zelenskıyge Qırım.Aqiqat mühbiri Anna Andriyevskaya, Qırımdan olğan ukrain jurnalistler Valentina Samar, Sevgil Musayeva, Anastasiya Ringis ve Milena Amedi sualler berdi.
