Rusiye mahkemesi tarafından apis cezasına mahküm etilgen "Hizb ut-Tahrir davası"nıñ mabüsleri Osman ve Seytumer Seytumerov Novoçerkask SİZO-sından Vladimirdeki apishanege etap etildi. Bunı "Qırım birdemligi" cemaat birleşmesi haber ete.
"İş urbasını berdiler, şahsiy şeylerden yalıñız havlı ve namazlıqnı qaytardılar. Kamera boş, sabadan matraslarnı bile alıp keteler ve tek gece qaytaralar. Qardaşınen bir apishanedeler, amma farqlı kameralarda", - dep aytıp berdi Seytumer Seytumerovnıñ apayı pakize.
"Olarnı stolıpin vagonlarında etap ettiler. Etap başlanğanından bulunğan yerleri aqqında malümat yoq edi", - dep qoştı o.
Vladimirge kelgen soñ Seytumer Seytmurovnı 20 künge karantin kamerasına oturtqanlar. Karantin vaqtında tükândan azıq mallarını sımarlamaq, evge telefon etmek mümkün degil.
Uquq qoruyıcılarnıñ bildirgenine köre, apiste Seytumerovnıñ tişleri bozulğan, kameradaki daimiy dımlılıq sebebinden öksürügi peyda olğan.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
