Rusiye mahkemesi tarafından 12 yıl apis cezasına mahküm etilgen vatandaş jurnalisti, siyasiy mabüs Amet Suleymanovğa SİZO-da hastalığına baqmadn yatmağa yasaq ettiler. Bunı apayı Lilâ Lümanov Facebookta haber etti.
İyülniñ 27-nde Suleymanovnıñ ağır hastalığı sebebinden cezadan azat etilmesi ile bağlı muracaat baqılğan. Apayınıñ sözlerine köre, laf etmek vaqıt olmağan, olar tek selâmlaşıp olğanlar. SİZO-da onı advokatı da ziyaret etken.
"Amet bütün kün ayaqta eken. Oña yatmaq mümkün degil. Kiçik skemleler bar eken, anda oturmaq mümkün. Yani insanğa uzanmaq bile mümkün degil. Elbette onıñ ayaqları şişken. Poliknikağa barıp, onıñ ekimi ile laf etmek isteyim. Bütün kün ayaqta keçirgeni içün tromblar peyda olacağından qorqam", - dep bildirdi Lümanov.
O, SİZO-da mahkümlerni gimnni ezberlemek ve yırlamağa mecbur etkenlerini ayttı.
"Men añlağanıma köre, o çay bile özüne demlep olamay. Tek azır qave, o da musluqtan sıcaq suv aqqan künleri", - dep añlattı apayı.
İzolâtorda kitaphane bar eken, amma mahkümlerge kitap saylamaq imkân bermey ekenler, kitaplarnı SİZO hadimi saylap ketire eken.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
