Rusiye mahkemesi tarafından 12 yıl apis cezasına mahküm etilgen vatandaş jurnalisti Amet Suleymanov tevqif etilip, izolâtorğa ketirildi. Bundan evel, o, yürek hastalığı sebebinden ev apsinde edi. Bunı "Qırım birdemligi" cemaat birleşmesi haber etti.
"Olar, müürli vesiqa kelgenini, üküm quvetini alğanını dediler. Ramazan ayında oraz tutamız, bütün kün aş aşamadıq, eñ az 10 daqqa vaqtımız ola bilirmi, dep soradım. Aş aşaması ve kiyinmesi içün eñ az 15 daqqa bermelerini istedim. Olar yoq, tez alıp ketmek kerekmiz dediler. Amet yalıñız aqşam namazını oqup, kiyinmege yetiştirdi", - dep aytıp berdi Suleymanovnıñ ömür arqadaşı Lilâ Lümanova.
"Sağlıq vaziyeti ve bu müessiselerde qalma şaraiti uyğunsız olğanı içün bu cezanı ölüm olaraq sayamız. Ametniñ bir çoq hastalığı bar: bu em yürek, em aqciger, em aşqazan ve buğumlar, yaqında onda gonartroz tasdıqlandı – bu buğum kemirçeklerniñ dağıluvıdır", - dep qoştı o.
Advokat Sergey Zayets, BMT Komiteti kerçek apis etüv ile ükümniñ icra etilüvini toqtatmaq talabınen Rusiyege muracaat etkenini bildirdi. Teşkilât ertaraflı tibbiy baqınuv keçirilmesinde ve kerekli tedaviylev kösterilmesinde israr ete.
"Komitetniñ bu ara qararı mahkümniñ ayatını qurtarmağa fırsat bere, amma yazıq ki, açıqça aqsız bir cezanıñ icra etiüvini de istisna etmey", - dep uquq qoruyıcı qararnı izaatladı.
Fevralniñ 10-nda Rusiyeniñ Vlasiha İstinaf mahkemesi şikâyetni red etip, vatandaş jurnalisti Amet Suleymanov, Rustem Seytmemetov, Seytumer ve Osman Seytumerov ağa-qardaşına qarşı Rostov-na-Donu Cenübiy bölgeniñ arbiy mahkemesiniñ qararını quvette qaldırdı.
Amet Suleymanov yüreginiñ arterial ve mitral yetersizligini çeke, onıñ yürek klapanınıñ deñiştirilmesi içün acele ameliyatqa ihtiyacı bar.
Mudafaa tarafı, esnas devamında Amet Suleymanovnıñ sağlı vaziyeti sebebinden böyle bir apis tedbirini qullanmaq mümkün olmağanını añlatmaq tırıştı.
Onıñ imayecisi Lilâ Gemeci ükümni öldürici dep saya: "Onı ölümge mahküm ettiler. Böyle diagnoz ile adamnıñ apis etilmesi tsinizmdir".
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
