"Qırım musulmanları davası" boyunca mahküm etilgen Eskender Abdulganiyev Rusiyeniñ Kemerovo vilâyetindeki №41 apishanege avuştırıldı. O anasına yazğan mektübinde, bundan soñ onı ceza izolâtorına yolladılar, dep bildirdi.
"Qırım birdemligi" qayd etkenine köre, Abdulganiyev mektüpni martnıñ 6-nda yollağan, amma koloniyağa bir ay evelsi, fevralniñ 14-nde kelgen. Kelgen künü onı ŞİZOğa yerleştirgenler.
''Sizden mektüp almadım, advokat da kelmedi. <...> Mende er şey yerinde. Siziñ içün pek qasevetlenem. Mektüpni alğan soñ, cevap beriñiz", - dep yazdı qırımlı.
Arsen Abhairov ve daa eki qırımtatar Eskender Abdulganiyev ve Rustem Emiruseinov 2019 senesi fevral ayında Qırımnıñ Qurman rayonınıñ Büyük-Onlar qasabasında tutuldı. Rusiye FSB-sı qırımlılar Rusiyede ve işğal etilgen Qırımda yasaq etilgen "Hizb ut-Tahrir" teşkilâtınıñ faaliyetine alâqası bar, dep iddia ete edi.
Noyabrniñ 3-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi Qurman "Hizb ut-Tahrir" davasınıñ üç mabüsini 42 yılğa apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
