Daa evel onıñ oğlu bildirdi ki, 41-inci koloniyada oña ceza izolâtorında bulunmasını devamlı uzatqanlar. Onı anda koloniya başı vazifelerini eda etken Dmitriy Zilâkov ve telükesizlik ve operativ iş boyunca baş müdir muavini Andrey Sidorov yollağan edi. Olar Eskenderniñ "daimiy bozuvlarğa oğrağan" "qorqunçlı bozucı" olğanı sebebinden umumiy taqımğa kirsetilmeycegini bildirdiler.
Neticede qırımtatar ŞİZO-da beş ay devamında - fevralniñ 14-nden iyünniñ 21-ne qadar (beş künlük teneffüsnen) keçirdi. Soñra kamera tipindeki odağa avuştırıldı. O, ŞİZO şaraitleri ve kamera tipindeki odanı qanaatlendiricisiz dep tarif etti ve memuriyetten Kemerovo vilâyetiniñ insan aqları vekâletlisiniñ ve Rusiye Cemaat nezaret komissiyasınıñ temsilcisiniñ alâqalarını soradı, em de imamnen körüşmege istedi. Lâkin bu ricalar körmemezlikke uruldı. Bundan soñ Eskenderni 41-inci koloniyadan alıp kettiler.
Emine Abdulganiyevanıñ aytqanına köre, oğlu Rusiye vatandaşlığını qabul etmegeni içün Kemerovo koloniyasına avuştırıldı.
"Menimce, bunıñ içün onı taqip ete ediler, ve bu sebepten o, daima ŞİZO-da otura edi. Tünevin, iyülniñ 9-nda, 29-ncı koloniyada bulunğanını bildirgen mektübini aldıq. Anda daa qattı şaraitler bar, Vladimir apishanesinde olğanı kibi. O, kamera nezareti altında buluna, lagerde degil, kamerada. Saba saat 5-te olarnı yataqnı köterip, yataqnı alıp keteler, ve bütün kün, aqşam saat 10-ğace, oğlum ayaqta tura. Kezinti yalıñız bir saat, küneş yarığı damdaki tar bir boşluqtan keçken yürüş odasında. Añlağanıma köre, şaraitler 41-nci koloniyadaki ŞİZOdan da beter", — dep tarif etti Emine Abdulganiyeva.
Eskender Abdulganiyev, Arsen Abhairov ve Rustem Emiruseinov 2019 senesi fevral ayında Qırımnıñ Qurman rayonınıñ Büyük Onlar qasabasında tutuldı. Rusiye FSB-si qırımlılar Rusiyede ve ilhaq etilgen Qırımda yasaq etilgen "Hizb ut-Tahrir" teşkilâtınıñ faaliyetine alâqası bar, dep iddia ete edi.
Noyabrniñ 3-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi Qurman "Hizb ut-Tahrir" davasınıñ üç mabüsini 42 yılğa apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
