Bağçasaraydaki ekinci «Hizb ut-Tahrir davasınıñ» mabüsi Seyran Saliyevniñ anası tek Ukrainanıñ Rostov-na-Donu konsulı Taras Malışevskiynen bağlanğan soñ oğlunı körmek içün ruhset alıp oldı.
Bu aqta Zodiye Saliyeva «Qırım Birdemligi» cemaat birleşmesine bildirdi.
«Noyabr ayında körüşip olamadıq. Dekabrniñ 5-nde noyabr izni endi kelişmey, dep aytqanlar, onıñ müddeti bitti, tek noyabrde kelmek kerek edi. Anda ne kün, ne saat yazılğan – körüşüvge ne vaqıt kelmek mümkün qayd etilmedi dedim. Ukrainanıñ Rostov-na-Donu baş konsulı Taras Malışevskiyge telefon etmege mecbur oldım. Yardım etmege tırışacaq, dep ayttı. İzin berildi. Üyleden soñ oğlumnı kördim», – dep tarif etti Seyran Saliyevniñ anası.
Zodiye Saliyevanıñ aytqanına köre, oğlu «pek azdı», çünki SİZOda berilgen aşnı er vaqıt aşamay.
«Mında çoq aşamağa istemeymiz, er kün aş almaymız, çünki bir kün domuz etli aş bereler, ekinci künü aşta domuz eti olmay», – dedi Zodiye Saliyeva.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
